មជ្ឈមណ្ឌលអភិរក្សជីវៈចម្រុះអង្គរ (ACCB;www.accb-cambodia.org) មានទីតាំងងាយស្រួលរកបំផុត ពោលគឺនៅក្បែរច្រកចូលក្បាលស្ពាន។ មជ្ឈមណ្ឌលនេះសង្រ្គោះ ព្យាបាល បន្ស៊ាំ និងព្រលែងសត្វព្រៃដែលរងគ្រោះទៅក្នុងព្រៃវិញ តាមរយៈការអប់រំប្រជាពលរដ្ឋឲ្យយល់ពីផលប្រយោជន៍នៃកេរ្តិ៍ដំណែលធនធានធម្មជាតិ និងការអភិរក្សសម្បត្តិធម្មជាតិជាដើម។ ប្រភេទសត្វមួយចំនួនដែលកំពុងទទួលបានការការពារនៅទីនេះ រួមមានសត្វពង្រូល សត្វទោចមួយប្រភេទឈ្មោះទោចម្កុដ ប្រភេទសត្វស្វាម្យ៉ាងឈ្មោះ ព្រាម។
ការចូលទស្សនា អមដោយមគ្គុទេសក៍ណែនាំ និងមានពីរវេនគឺ ម៉ោង៩ព្រឹក និង ម៉ោង១រសៀលជារៀងរាល់ថ្ងៃ (លើកលែងថ្ងៃអាទិត្យ) ហើយអ្នកចូលទស្សនាត្រូវបានសំណូមពរឲ្យបរិច្ចាគ ៣ដុល្លាសម្រាប់១នាក់។
មជ្ឈមណ្ឌលមេអំបៅបន្ទាយស្រី (BanteaySrey Butterfly Center) ជាមជ្ឍមណ្ឌលដែលហ៊ុមព័ន្ធដោយ ធម្មជាតិ និងធំជាងគេនៅអាស៊ីអាគ្នេយ៍ដែលមានមេអំបៅជាង៣០ប្រភេទ។ ការទស្សនានៅទីនេះ ភ្ញៀវអាចទទួលបានបទពិសោធន៍តាមរយៈការរៀនសូត្រនូវរាល់ដំណាក់កាលនៃការកកើតមេអំបៅតាំងពីស៊ុត ទៅជាដង្កូវ កូនមេអំបៅរហូតដល់មេអំបៅដែលអាចហោះហើរបាន។ បន្ទាប់ពីរីករាយនឹងការទស្សនានៅទីនេះអមដោយមគ្គុទេសដ៏រាក់ទាក់ ភ្ញៀវក៏អាចទទួលទានអាហារពេលថ្ងៃ និងភេសជ្ជៈនៅ Café Butterfly ដែលមានមេអំបៅហិចហើរឆ្វែលឆ្វាត់នៅជុំវិញទៅនោះផងដែរ។ មជ្ឈមណ្ឌលមេអំបៅនេះបើកដំំណើរការជារៀងរាល់ថ្ងៃចាប់ពីម៉ោង៩ព្រឹក ដល់ម៉ោង៤:៣០ល្ងាច ហើយតម្លៃចូលទស្សនាគឺ ៥ដុល្លាសម្រាប់មនុស្សធំ និង២ដុល្លាសម្រាប់ក្មេង(៥ - ១០ឆ្នាំ(។
សហគមន៍ព្រៃឈើព្រៃក្បាលទឹក គឺជាតំបន់ទេសចរណ៍សហគមន៍ធម្មជាតិថ្មី ដែលមានប្រភេទសត្វ រុក្ខជាតិប្លែកៗ ដូចជា ដើមបំពង់ឡុក និងរុក្ខជាតិស៊ីសត្វល្អិតផ្សេងៗ។ នៅទីនេះក៍មានអ្នកនាំភ្ញៀវក្នុង មូលដ្ឋានដើម្បីនាំដើរកំសាន្តក្នុងព្រៃផងដែរ ។
